ҚМГ мен Eni басшылары бірлескен жобаларды іске асыру барысын талқылады

«ҚазМұнайГаз» ҰК АҚ (ҚМГ) Басқарма төрағасы Асхат Хасенов «Eni SpA» компаниясының Жаһандық табиғи ресурстар бөлімінің барлау және өндіру жөніндегі директоры Лука Виньятимен кездесті. Солтүстік Каспий және Қарашығанақ жобаларын іске асырудың қазіргі жағдайы, қазақстандық кадрларды даярлау мәселелері, сондай-ақ гибридті электр станциясын салу және геологиялық барлау саласындағы ынтымақтастықты кеңейту мәселелері талқыланды.

Кездесуде А.Хасенов Қашаған кен орнын одан әрі толық игеру бағытындағы жоспарларға тоқтала келе, тиісті іс-шараларды пысықтау бойынша күш-жігерді біріктіру маңызын атап өтті. Сондай-ақ ҚМГ-ның NCOC және KPO-дағы қазақстандық мамандар санын көбейту басымдылығын ескере отырып, 2020-2025 жылдарға арналған жергілікті кадрлар үлесін арттыру бағдарламасын 2030 жылға дейінгі кезеңге жаңарту талап етіледі.

Маңғыстау облысының Жаңаөзен қаласындағы қуаты 247 МВт болатын гибридті электр станциясы құрылысының барысы да кездесуде сөз болды. Гибридті электр станция құрылысын жүргізу барысында 800-ге жуық адам тартылады, объект пайдалануға берілгеннен кейін 70-ке дейін жаңа жұмыс орны ашылады. Күн электр станциясы 2025 жылдың III тоқсанында, ал газ және жел электр станциялары 2026 жылы іске қосылады деп жоспарланған.

Екіжақты ынтымақтастықтың жаңа бағыттарының бірі — геологиялық барлау. Биыл Eni компаниясы ҚМГ-ның әлеуеті жоғары жаңа жобалары таныстырылған роуд-шоуға шақырылды. Қазіргі уақытта аталған учаскелерді бағалау жүргізілуде.

Анықтама: 2025 жылғы 5 айдың қорытындысы бойынша Қашағанда 7,7 млн тонна мұнай өндірілді. 2025 жылға арналған жоспар — 18 млн тонна. Қарашығанақта 2025 жылдың 5 айында 4,8 млн тонна мұнай өндірілді. Биыл кен орнында 11,14 млн тонна мұнай және 25,57 млрд текше метр газ өндіру жоспарланған.